عمران خان کی رپورٹس میں شراب اور کوکین کا بے دریغ استعمال ، قادر پٹیل

 عمران خان کی میڈیکل رپورٹس میں شراب اور کوکین کا بے دریغ استعمال سامنے آیا ہے: وزیر صحت 

 وفاقی وزیر صحت عبدالقادر پٹیل سابق وزیراعظم عمران خان کی رپورٹ منظر عام پر لے آئے اور میڈیا کے سامنے پیش کردی۔ 

   قادر پٹیل کا کہنا تھاکہ جمہوری حکومت میں ہر دستاویز عوامی دستاویزات ہوتی ہیں، بعد از گرفتاری عمران خان نیازی کو پمز اسپتال لے جایا گیا تھا اور ان کے طبی معائنے کیلئے اسی اسپتال میں میڈیکل بورڈ بھی بنایا گیاتھا ۔ کراچی میں پریس کانفرنس 

 انہوں نے کہا کہ عمران خان 5 سے 6 مہینے تک پلستر لگا کر گھومتے رہے جبکہ کسی فریکچر کا رپورٹ میں ذکر نہیں ہے، کسی شخص کو گوشت میں کوئی چوٹ آجائے تو اسے پلستر کرتے دیکھا ہے؟  

   ان کا کہنا تھا کہ پیشاب کے نمونے بھی حاصل کر لیے گئے، ابتدائی رپورٹ میں ٹاکسک چیزیں جن میں شراب اور کوکین کا بے دریغ استعمال سامنے آیا ہے، اب اس کا تناسب نہیں آتا ہم کسی حتمی نتیجے پر جائیں گے، رپورٹ میں یہ بھی انکشاف ہوا ہے کہ عمران کی ذہنی حالت پر سوالیہ نشان ہے، ان کی حرکات و سکنات فٹ آدمی کی نہیں تھیں، رپورٹ میں ہے کہ جس آدمی کی دماغی حالت ٹھیک ہو ایسی حرکتیں نہیں کرسکتا۔ 

 عبدالقادر پٹیل نے کہا کہ عمران خان نے نوجوانوں کو جس راستے پر لگایا اس کا نتیجہ سب نے دیکھ لیا، کیا اسی شخص کو ڈیم والے جج نے صادق اور امین قرار دیا تھا؟ عمران خان باتیں کیا کرتا ہے اور میڈیکل رپورٹوں سے کیا نکلتا ہے، پاکستان کے عوام اپنے بچوں کو اس کے حوالے نہ کریں۔ 

 ایک سوال کے جواب میں وفاقی وزیر کا کہنا تھاکہ جن ڈاکٹرز نے عمران خان کی ٹانگ پر فریکچرکا لکھا ہے غلط پریکٹسیز کیلئے متعلقہ اتھارٹیز کو لکھوں گا۔ 

 قادر پٹیل نے کہا کہ عمران خان کی میڈیکل رپورٹ عوامی دستاویز ہے شائع کی جائے گی، عمران خان کی تفصیلی میڈیکل رپورٹ آئے گی تو پھر پولیس کو بھجوائیں گے۔