ایک شخص نے طیارے میں مسافروں کی زندگیوں کو خطرے میں ڈال دیا

ایک شخص نے پرواز کے دوران طیارے کا دروازہ کھول دیا، متعدد مسافر بے ہوش ہوگئے۔  

 بہت ہی حیران کن وخطر ناک واقعہ جنوبی کوریا میں پیش آیا۔ 

ایشیانا ائیر لائنز کی اڑان کے دوران ایک مسافر نے طیارے کے اترنے سے پہلے ہی ایمرجنسی دروازہ کھول دیا۔

طیارے نے جنوبی کوریا کے شہر ڈائے گو میں لینڈ کرنا تھا، طیارے کے اترتے ہی ایک مسافر نے دروازہ کھول دیا، جس کے بعد ہوا کے جھکڑوں نے مسافروں کو خوف زدہ کر دیا اور انہوں نے اپنی نشستوں کو مضبوطی سے پکڑ لیا۔

مذکورہ واقعہ کی ویڈیو بھی سوشل میڈیا پر وائرل ہوچکی ہے۔

جنوبی کورین میڈیا کے مطابق 30 سال سے زائد عمر کے ایک شخص نے اس وقت دروازہ کھولا جب طیارہ زمین سے 250 میٹر اوپر موجود تھا۔

دروازہ کھلنے کی وجہ سے چند خوف زدہ مسافر بے ہوش ہوگئے تھے جبکہ کچھ کو سانس لینے میں دشواری کا سامنا کرنا پڑا تھا ، جن کو اسپتال پہنچایا گیا۔

خوش قسمتی سے دروازہ کھلنے کے باوجود طیارہ بحفاظت اتر گیا اور اس میں سوار 194 مسافر محفوظ رہے۔

دروازہ کھولنے والے آدمی کو پولیس نے گرفتار کر لیا اور حکام کا بتانا ہے کہ ملزم یہ بتانے سے قاصر ہے کہ اس نے ایسا کیوں کیا۔

طیارے میں سوار ایک 44 سالہ مسافر نے بتایا کہ دروازے کے قریب موجود افراد بہت زیادہ خوفزدہ ہوچکے تھے اور وہ ایک، ایک کرکے بے ہوش ہونے لگے۔

اس شخص کا کہنا تھا کہ 'مجھے ایسا لگا کہ طیارہ گر کر پھٹنے والا ہے اور یہ میری آخری سانس ہے'۔